Yeremia 20
Yeremia Gweskys gans Pashhur
1Lemmyn Pashhur mab Immer an oferyas, neb o ynwedh pennsoedhek yn chi an Arloedh, a glewas Yeremia ow profoesa an traow ma. 2Ena Pashhur a weskis Yeremia an profoes, ha'y worra yn stokkys esa yn Yet Benyamin wartha, esa yn chi an Arloedh. 3Ha'n nessa myttin Pashhur a livras Yeremia a'n stokkys. Ena Yeremia a leveris dhodho, Ny'th henwis an Arloedh Pashhur, mes Magor-missabib. 4Rag yndellma y lever an Arloedh: Otta, my a'th wra browagh dhis dha honan, ha dhe'th kowetha oll: hag i a goedh gans kledha aga eskerens, ha'th tewlagas a'n gwel: ha my a re Yuda oll yn leuv myghtern Babylon, hag ev a's deg yn divroedh yn Babylon, ha'ga ladha gans an kledha. 5Kekeffrys my a re tresor oll an sita ma, hag oll frut hy lavur, hag oll hy thaklow drudh, ha provians oll myghternedh Yuda – my a's re yn leuv aga eskerens, hag i a's pyll, ha'ga doen dhe Babylon. 6Ha ty, Pashhur, ha pubonan usi trigys y'th chi a wra mos yn kethneth: ha ty a dheu dhe Babylon, hag ena ty a verow, ha bos ynkleudhys ena, ty, ha'th kowetha oll, neb may profoessys gowyow dhedha.
Notes for verses 1–61 entry
Text notes
Jeremiah 20:3 Magor-missabib: Henn yw dhe styrya, Euth a bub tu. View in passage
Krodhvol Yeremia
7A Arloedh, ty re'm dynyas,
ha my a veu dynys:
ty a'm gwaskas yn krev,
ha ty re fethas:
skornys ov pub dydh,
pubonan a wra ges ahanav.
8Rag peskweyth may kowsav, my a gri,
my a arm ‘Freudh ha distruyans!’
Rag ger an Arloedh a dheuth ha bos keredh dhymm,
ha skorn pub dydh.
9Ena my a leveris, ‘Ny'n kampoellav,
na kewsel namoy yn y hanow.’
Mes ynnov yma neppyth haval dhe dan ow leski
deges y'm eskern,
ha skwith ov owth omfronna,
ha ny allav y berthi.
10Rag my a glewas kabel lies huni:
‘Euth a bub tu!
Kuhudh e, gwren y guhudha.’
Yth esa oll ow neskerens
ow kwaytya my dhe drebuchya,
ow leverel, ‘Martesen ev a vydh dynys,
ha ni a wra y fetha,
ha tyli agan dial warnodho.’
11Mes yma an Arloedh genev avel kasor fell;
ytho ow helghysi a drebuch,
ha ny wrons fetha;
i a's tevydh meth meur,
rag ny sewenons:
ny vydh ankevys
aga disenor bys vykken.
12Mes, A Arloedh an luyow, neb a brev an re wiryon,
neb a wel an dhiwloneth ha'n golonn,
gas vy dhe weles dha dhial warnedha:
rag dhiso jy my re dhiskwedhas ow hen.
13Kenewgh dhe'n Arloedh,
gormelewgh an Arloedh!
Rag ev re dhelivras enev an boghosek
a-dhiworth leuv an dhrogoberoryon.
14Milliges re bo an jydh
may feuv genys;
an jydh ma'm dineythis ow mamm
na'n gas dhe vos bennigys.
15Milliges re bo an gour
a dhros nowodhow dhe'm tas, ow leverel,
‘Flogh gorow yw genys dhis’,
orth y heudhhe yn feur.
16Gas an gour na dhe vos avel an sitys
a dhomhwelas an Arloedh, yn tibita;
gas ev dhe glewes kri myttinweyth,
ha garm yn hanter-dydh,
17rag ny'm ladhas y'n dorr,
may fe ow mamm ow bedh,
ha'y thorr veghyek bys vykken.
18Prag y teuth vy yn-mes a'n dorr
dhe weles lavur hag ahwer,
ha spena ow dydhyow yn meth?