Read the Bible

¹Konfortyewgh, konfortyewgh ow fobel,

a lever agas Duw.

²Kewsewgh orth kolonn Yerusalem,

ha gelwewgh dhedhi

hy gonis dhe vos gorfennys,

ha tylys kessydhyans hy hammweythres,

rag hi re dhegemmeres a dhorn an Arloedh

dewgemmys rag oll hy feghadow.

³Unn lev a gri:

‘Y'n gwylvos pareusewgh hyns an Arloedh,

gwra kompes y'n difeyth fordh-veur rag agan Duw.

⁴Pub nans a vydh drehevys yn-bann,

ha pub menydh ha bre a vydh iselhes;

an tir ankompes a vydh leven,

ha'n tylleryow garow nans ledan.

⁵Ha glori an Arloedh a vydh diskwedhys,

ha pub kig a wra y weles war-barth,

rag ganow an Arloedh re gewsis.’

⁶Unn lev a lever: ‘Galw!’

Hag y leveris vy, ‘Pyth a alwav?’

Kig yw gwels,

hag oll y splannder yw haval dhe vleujenn an gwel.

⁷An gwels a wedher, gyllys krin yw an vleujenn,

drefenn anall an Arloedh dhe hwytha warnodho;

avel gwels yw an bobel diogel.

⁸An gwels a wedher, gyllys krin yw an vleujenn,

mes ger agan Duw a sev bys vykken.

⁹Yskynn yn menydh ughel,

A Sion, dyller nowodhow da;

drehav dha lev gans nell,

A Yerusalem, dyller nowodhow da;

drehav e yn-bann heb own;

lavar dhe sitys Yuda,

‘Otta dha Dhuw!’

¹⁰Otta, an Arloedh Duw a dheu gans nerth

ha'y vregh a rewl ragdho;

otta, yma y wober ganso,

ha'y werison a-ragdho.

¹¹Avel bugel ev a vag y flokk;

gans y vregh ev a guntell y eyn

ha'ga doen yn y askra;

ev a hembronk yn hwar an re usi ow ri bronn.

¹²Piw yw re vusuras an dowrow yn palv y leuv,

ha re verkyas an nevow gans dornva,

ha re synsis doust an bys yn musurva,

ha re boesas an menydhyow yn mantol

ha'n breow yn balans?

¹³Piw a gevarwoedhas Spyrys an Arloedh,

po avel y gusulyer a'n dyskas?

¹⁴Piw ganso yth omgusulyas dhe ri dhodho konvedhes

ha dhe dhyski dhodho an hyns a wirvreus?

Piw a dhyskas skians dhodho,

hag a wrug dhodho godhvos an fordh a gonvedhes?

¹⁵Otta, an kenedhlow yw avel banna dhiworth kelorn,

hag avel polter war an vantol synsys yns.

Otta, ev a gemmer an ynysow yn-bann avel ponn.

¹⁶Nyns yw Lebanon lowr rag keunys an tan,

na'y vestes lowr rag offrynn leskys.

¹⁷An kenedhlow oll yw avel mann a-ragdho;

synsys yns ganso le es mann, ha gwakter.

¹⁸Piw dhodho yth hevelebowgh Duw,

po py hevelep a vynnowgh y wul dhodho?

¹⁹An imajys yw teudhys gans an krefter,

ha'n owrer a ystynn owr mortholys warnodho,

hag a wra ragdho kadonyow a arghans.

²⁰Neb yw re voghosek rag offrynn

a dhewis prenn na wra pedri;

ev a hwila ser konnyk ragdho

rag drehevel imaj gravys na vydh deantell.

²¹A ny wodhowgh? A ny glewsowgh?

A ny veu kewsys dhywgh a-dhia'n dhallethva?

A ny gonvedhsowgh a-ban veu selys an bys?

²²Ev a esedh war gylgh an bys,

ha'y drigoryon avel kulyeges-reden yth yns;

ev a ystynn an nevow avel vayl,

hag a's les avel tylda ynno may trigir.

²³Ev a dhre pennternedh dhe vos mann;

ha gul breusysi an bys gwakter.

²⁴Skant nyns yns i plynsys, skant nyns yns i hesys,

skant ny wra aga ben gwreydhya y'n dor,

kyns ev dhe hwytha warnedha hag y hwedhrons,

ha'n korwyns a's dre dhe-ves avel kulyn.

²⁵Ytho piw dhodho y'm hevelebowgh,

may fiv par dhodho? yn-medh an Sans.

²⁶Drehevewgh yn-bann agas dewlagas, ha gwelewgh:

piw a wrug an re ma?

Ev neb a dheg yn-mes aga lu, orth aga nivera,

ha'ga gelwel pubonan orth hanow;

der y nerth meur ha'y alloes krev

ny fyll onan vyth.

²⁷Prag y leverydh, A Yakob,

hag y kewsydh, A Ysrael,

‘Kudhys yw ow fordh rag an Arloedh,

ha dispresys yw ow breus gans ow Duw’?

²⁸A ny wodhves,

a ny glewsys?

An Arloedh yw an Duw heb diwedh,

Kreador pennow an norvys.

Ny glamder na ny vydh skwith;

dres hwithra yw y gonvedhes.

²⁹Ev a re nerth dhe'n re wann,

ha dhe neb na'n jeves galloes ev a voghha nerth.

³⁰Bys y'n re yowynk yth or klamderek ha skwithys,

ha gwer yowynk fest a drebuch;

³¹mes an re a worta an Arloedh

a nowydhha aga nerth.

I a yskynn gans eskelli avel eryon;

i a boen heb bos skwith,

i a gerdh heb klamdera.