Ysay 38
Kleves Hezekia
1Y'n dydhyow na Hezekia o klav bys yn eneworres, hag Ysay mab Amos an profoes a dheuth dhodho, ha leverel dhodho, ‘Yndellma y lever an Arloedh: Roy arghadow dhe'th chi, rag ty a verow ha ny vewydh.’ 2Ena Hezekia a dreylyas y fas dhe'n fos ha pysi war an Arloedh, 3ha leverel, ‘A Arloedh, porth kov, my a'th pys, fatell esen ow kerdhes a-ragos yn gwiryonedh hag a leun golonn, ha my re wrug an pyth yw da y'th wolok.’ Ha Hezekia a oelas yn hwerow.
4Ena ger an Arloedh a dheuth dhe Ysay, ow leverel, 5‘Ke ha lavar dhe Hezekia, Yndellma y lever an Arloedh, Duw Davydh dha das: My re glewas dha bysadow, my re welas dha dhagrow; awottavy ow keworra dhe'th tydhyow pymthek blydhen. 6My a wra dha dhelivra jy ha'n sita ma yn-mes a leuv myghtern Assyria, ha defendya an sita ma.
7‘Ha homm yw an tokyn dhis dhiworth an Arloedh, y hwra an Arloedh an dra ma re ambosas: 8My a wra dhe'n skeus tewlys gans an howl war grisyow Ahaz treylya war-dhelergh deg gris.’ Ytho an howl eth war-dhelergh war an deg gris may hwrussa mos yn-nans.
9Skrifenn Hezekia myghtern Yuda, pan via klav ha bos yagh wosa y gleves:
10My a leveris: Yn hanter-dydh ow bewnans
res yw dhymm mos;
ha bos niverys yn yetys Sheol
yn remenant ow blydhynyow.
11My a leveris, Ny welav an Arloedh
yn tir an re vew;
ny virav orth den byth moy
yn mysk trigoryon an norvys.
12Ow thrigva yw tennys yn-mes ha destryppys dhiworthiv
avel tylda bugel;
avel gwiader re rolis vy ow throgel;
ev a'm tregh dhe-ves dhiworth an steuv;
dydh ha nos ty a'm dre dhe dhiwedh.
13My a wrowedhas bys vyttin;
avel lew, yndella ev a derr oll ow eskern;
dydh ha nos ty a'm dre dhe dhiwedh.
14Kepar ha gwennel po garan, yndella y gryllis;
my a gynis kepar ha kolomm.
Ow dewlagas a fyll ow mires war-vann.
A Arloedh, yma ankres dhymm, bydh goestel ragov.
15Pandr'a lavarav? Ev re gewsis dhymm,
hag ev y honan re'n gwrug.
My a gerdh yn lent oll ow blydhynyow
drefenn hwerowder ow enev.
16Arloedh, der an taklow ma tus a vew,
hag ynna oll yma bewnans ow spyrys.
Ty a'm restoryas dhe yeghes
ha gul dhymm bewa.
17Otta rag les
y feu dhymm hwerowder;
mes ty re withas ow enev
dhiworth an pytt a dhistruans,
rag ty re dewlis oll ow feghosow
a-dryv dha geyn.
18Rag ny yll Sheol godhvos gras dhis,
na ny yll ankow dha wormel;
an re a dhiyskynn dhe'n pytt
ny yllons gwaytyas dha wiryonedh.
19Den bew, ny yll marnas den bew dha wormel,
avelov vy hedhyw;
tasow a wra godhvedhys dhe vebyon
dha wiryonedh.
20An Arloedh a'm saw,
ha ni a gan gans daffar kerdyn
oll dydhyow agan bewnans
yn chi an Arloedh.
21Ysay a lavarsa, ‘Drens powltis a figys ha'y lesa war an brewvann may fo yaghhes.’ 22Ynwedh Hezekia a leveris, ‘Pandr'a vydh an tokyn my dhe yskynna dhe ji an Arloedh?’