Ysay 31
Euver yw Keffrysyans gans Ejyp
1Go-i an re a dhiyskynn dhe Ejyp rag gweres,
ha kregi war vergh,
ha trestya yn charettow rag aga bos lies,
hag yn marghogyon rag aga bos pur nerthek,
mes ny virons orth Sans Ysrael,
na ny hwilons an Arloedh.
2Mes ev yw fur hag a dhre drog;
ny dhaskelow y eryow,
mes ev a sev erbynn chi an dhrogoberoryon,
hag erbynn gweresoryon an re a wra sherewynsi.
3An Ejyptianys yw denel a-der Duw;
aga mergh yw kig a-der spyrys.
Pan wra an Arloedh ystynn y leuv,
an gwereser a drebuch ha'n den gweresys a goedh,
hag i oll a dhe goll war-barth.
4Rag yndellma y leveris an Arloedh dhymm:
Kepar dell romm lew po lew yowynk erbynn y breydh,
pan vo routh a vugeledh gelwys er y bynn,
ny berth own a'ga lev
na ny'n jeves euth aga thros,
yn kettella Arloedh an luyow a dhiyskynn
dhe vatalyas war venydh Sion, ha war hy bronn.
5Avel ydhyn ow pargesi, yndella Arloedh an luyow
a vydh skoes war Yerusalem;
ev a vydh skoes dhedhi ha'y delivra,
hy sparya ha'y sawya.
6Treylyewgh dhodho ev may hwrussons rebellyans down er y bynn, A vebyon Ysrael. 7Rag y'n jydh na pubonan ahanowgh a dhenagh y idolys owrek a wrug agas diwla dhywgh yn pegh.
8‘Assyria a goedh der an kledha a-der dre wour,
ha kledha, nag yw a vab-den, a's devor.
I a fi dhe'n fo rag an kledha
ha'ga gwer yowynk a vydh gorrys dhe hwel krev.
9Y garrek a dremen dhe-ves rag euth,
ha'y bennsevigyon a gilfi dhiworth an baner yn skruth’,
yn-medh an Arloedh, mayth usi y dan yn Sion,
ha'y fornes yn Yerusalem.