Hosea 8
Dislelder Ysrael
1Gorr hirgorn dhe'th hanow;
ev a varges avel er a-ugh chi an Arloedh,
rag i dhe derri ow hevambos,
ha rebellya erbynn ow lagha.
2I a wra garma dhymmo vy,
‘Ow Duw: ni, Ysrael, a'th aswonn!’
3Ysrael re naghas dader; eskar a wra y helghya.
4I re wrug myghternedh, mes nyns yns i ahanav;
i re wrug pennternedh, heb godhvos dhymm.
Gans aga arghans ha'ga owr y hwrussons imajys
may fens kisys.
5Ev re naghas dha leugh, Samaria!
Ow sorr a loskas er aga fynn.
Pes termyn ny allons kavoes glander?
6Rag dhiworth Ysrael yth yw!
Ser a'n gwrug,
ha nyns yw Duw.
Leugh Samaria
a vydh skyrr.
Notes for verses 4–61 entry
Text notes
Hosea 8:5 Ev re naghas dha leugh: War-lergh an Septuagint Nagh dha leugh. View in passage
7I re hasas an gwyns,
ha mysi an korwyns.
Garrow an ys ny's teves penn;
ny wra bleus.
Mar kwrello greun,
ena estrenyon a wra y lenki.
8Ysrael yw kollenkys;
lemmyn yth yns i yn mysk an kenedhlow
kepar ha lester diles.
9Rag gyllys yns yn-bann dhe Assyria,
avel asen gwyls digoweth.
Efraym re arvethas keryadesow.
10Kynth arvethsons yn mysk an kenedhlow,
lemmyn my a wra aga huntell,
hag i a hedh pols byghan
a untya myghtern ha pennternedh.
Notes for verses 7–102 entries
Text notes
Hosea 8:9 Efraym re arvethas keryadesow: Po Efraym re omwerthas dhe geryadesow. View in passage
Hosea 8:10 Ow siwya an Septuagint. Ebrow hag i a dhallathas lehe drefenn begh an myghtern a bennternedh. View in passage
11Kyn hwrug Efraym lies alter rag offrynn peghes,
i res eth ha bos alteryow rag peghes.
12Kyn skrifav ragdho ordenansow diniver ow lagha,
akontys yns avel neppyth astranj.
13I a sakrifi rohow dhymmo vy,
i a dheber an kig;
mes an Arloedh ny gemmer plesour ynna.
Lemmyn ev a berth kov a'ga sherewneth,
ha kessydhya aga feghosow:
dhe Ejyp y tehwelons.
14Ysrael re ankovas y Wrier,
ha re dhrehevis palesyow;
ha Yuda re wrug lies sita gerys.
Mes my a dhannvon tan yn y sitys
a dhevor y gastylli.