Read the Bible

¹Dewgh, dehwelyn dhe'n Arloedh:

rag ev re skwardyas,

hag a wra agan sawya;

ev re weskis,

hag a wra agan lystenna.

²Wosa dew dhydh ev a wra agan dasvewa;

y'n tressa dydh ev a wra agan drehevel,

ha ni a vew a-ragdho.

³Ytho re aswonnyn ni,

re hwillyn dhe aswonn an Arloedh.

Y dhevedhyans yw mar sur avel an bora;

ev a dheu dhyn avel an glaw,

avel an glaw diwedhes a dhowrha an tir.

⁴Pandr'a wrav dhis Efraym?

Pandr'a wrav dhis Yuda?

Agas lelder yw avel kommol myttin,

hag avel gluth a dremen a-varr.

⁵Ytho my a's nadhas dre'n brofoesi,

my a's ladhas dre eryow ow ganow;

ow breusow eth war-ves avel golow.

⁶Rag my a hwans tregeredh, a-der sakrifis,

ha skians Duw, a-der offrynnow leskys.

⁷Mes i re dorras an kevambos avel Adam:

ena i re'm traytas.

⁸Gilead yw sita a dhrogoberoryon,

disliw gans olow a woes.

⁹Ha kepar dell wra bagas a ladron kontrewaytya gour,

yndella y hwra bagas a oferysi;

ow moldra y'n fordh dhe Shekem,

ow kul drogober hegas.

¹⁰Yn chi Ysrael

my a welas tra vil.

Ena yma fornikasyon Efraym,

defolys yw Ysrael.

¹¹Ragos jy ynwedh, A Yuda, yma trevas settys,

pan dreylyav kethneth ow fobel.