Ebrowyon 1
Duw re Gewsis der y Vab
1Yn lies fordh hag yn lies gis, Duw a gewsis y'n kothenep dh'agan tasow der an brofoesi; 2mes y'n dydhyow diwettha ma ev re gewsis dhyn dre Vab, neb a wrug y ordena an her a bup-tra, dredho ynwedh may hwrug an oesow, 3neb yw dewynnyans golewder Duw ha gwir imaj y substans, ow mentena traow oll der an ger a'y nerth. Pan wrussa glanheans peghosow, ev a esedhas orth leuv dhyghow an Meuredh y'n tylleryow ughel, 4ow tos ha bos kemmys gwell ages an eledh, par dell yw an hanow a eritas bryntinna agessa i.
Notes for verses 1–41 entry
Text notes
Hebrews 1:3 wrussa: War-lergh re a'n dornskrifow wrussa dredho y honan. View in passage
An Mab Ughella ages an Eledh
5Rag dhe by el y leveris Duw bythkweth,
‘Ty yw ow Mab;
hedhyw my re'th tineythis’?
Po arta,
‘My a vydh Tas dhodho,
hag ev a vydh dhymm Mab’?
6Hag arta, pan dhre ev y'n bys an kynsa-genys, y lever,
‘Eledh Duw oll, gordhyens ev.’
7Hag a-dro dhe'n eledh y lever,
‘Neb a wra y eledh spyrysyon,
ha'y venysters flammow tan.’
8Mes a-dro dhe'n Mab y lever,
‘Dha dron, a Dhuw, yw bys vykken ha bynnari;
gwelenn wiryon yw gwelenn dha wlaskor.
9Ty re garas ewnder ha kasa anlaghedh;
yndella Duw, dha Dhuw, re'th untyas
gans oyl lowender dres dha geskowetha.’
10Ha,
‘Ty, Arloedh, y'n dalleth, a fondyas an nor,
ha'n nevow yw ober dha dhiwleuv;
11i a dhe goll, mes ty a bes;
i oll a gothha avel dillasenn;
12avel mantell ty a wra aga rolya war-barth,
hag avel dillasenn i a vydh chanjys.
Mes ty yw an keth,
ha dha vlydhynyow ny wrons fyllel.’
13Mes dhe by onan a'n eledh y leveris bythkweth,
‘Esedh orth ow leuv dhyghow
erna wrylliv a'th eskerens skavell rag dha dreys’?
14A nyns yns i oll spyrysyon menystra dannvenys rag gonis, a-barth an re a wra erita selwyans?