Read the Bible

¹Pan dhallathas mab-den kressya war enep an dor, hag y feu myrghes dineythys dhedha, ²mebyon Duw a welas myrghes mab-den ha'ga bos teg, hag i a gemmeras dhedha aga honan gwragedh a vyns anedha a dhewissons. ³Ena yn-medh an Arloedh, ‘Ny drig ow spyrys vy nevra gans mab-den, rag kig yw ev, ha'y dhydhyow a vydh hwegh-ugens blydhen.’

⁴Yth esa an Nefilim y'n nor y'n dydhyow na, hag a'y wosa keffrys, pan dheuth mebyon Duw dhe vyrghes mab-den; hag i a dhineythis fleghes dhedha. Tus alloesek ens i a dermyn koth, tus a vri.

⁵Ha'n Arloedh a welas bos droktra mab-den bras war an nor ha nag o pub mynnas a dybyansow y golonn marnas drog pub dydh oll. ⁶An Arloedh a repentyas ev dhe wul mab-den war an nor, ha grevys veu yn y golonn.

⁷Hag yn-medh an Arloedh, ‘My a vynn diswul dhiworth enep an dor an den a wrug vy y formya: den ha best ha pryv hag ydhyn an ayr, rag edrek a'm beus y hwrug vy aga gul.’ ⁸Mes Noy a gavas gras yn golok an Arloedh.

⁹An re ma yw henedhow Noy. Noy o gour gwiryon ha perfydh yn y dermyn hag yth esa Noy ow kerdhes gans Duw. ¹⁰Noy a dhineythis tri mab, Shem, Ham ha Yafeth.

¹¹An nor ynwedh o legrys a-rag Duw, ha lenwys o an nor a arowder. ¹²Ha Duw a welas an nor hag awotta, legrys ova, rag pub kig re wrussa legri y fordh war an nor. ¹³Hag yn-medh Duw dhe Noy, ‘Yma diwedh dhe bub kig devedhys a-ragov, rag lenwys dredha gans garowder yw an nor, hag awotta, my a vynn aga distrui gans an nor.

¹⁴‘Gwra dhis argh a brenn gofer. Ty a wra roumys y'n argh ha'y ura stanch a-ves hag a-ji gans pyg. ¹⁵Yndella ty a'n gwra. Hys an argh a vydh trihans kevelin, ha'y les hanter-kans kevelin, ha'y ughelder deg kevelin warn ugens. ¹⁶Ty a wra fenester dhe'n argh, ha bys yn unn kevelin ty a'n kowlwra a-wartha, ha gorra daras an argh y'n tenewen anodho; gans flouryow isella, nessa ha tressa ty a'n gwra. ¹⁷Rag awotta, yth esov vy ow honan ow tri liv dowrow war an nor dhe dhistrui pub kig hag ynno anall bewnans yn-dann nev. Pup-tra eus war an nor a wra merwel. ¹⁸Mes genes jy my a wra fastya ow hevambos; ha ty a wra dos a-bervedh y'n argh, ty ha'th vebyon ha'th wreg ha gwragedh dha vebyon genes jy. ¹⁹Hag a bub kreatur bew, a bub kig oll, ty a wra dri dew a bub sort anedha a-bervedh y'n argh dh'aga gwitha yn few genes jy. I a vydh gorow ha benow. ²⁰A'n ydhyn war-lergh aga hinda, hag a'n chatel war-lergh aga hinda, pub pryv a'n dor war-lergh y ginda, dew a bub sort anedha a wra dos dhis dh'aga gwitha yn few. ²¹Kemmer dhis neppyth a bub eghenn a voes a vo dybrys, ha ty a wra y guntell dhis; y fydh boes ragos jy ha ragdha i.’ ²²Ytho Noy a wrug war-lergh pup-tra a erghis Duw dhodho; yndella y hwrug ev.