Read the Bible

²Omguntellewgh ha klewes, a vebyon Yakob.

Goslowewgh orth Ysrael agas tas.

³‘Rewben, ow hynsa-genys osta,

ow krevder ha kynsa frut ow nerth gourel,

moyha yn reowta, moyha yn krevder.

⁴Ewynek avel dowr, ny vydh dhis ragwir,

rag ty eth yn-bann dhe weli dha das.

Ena ty a'n defolas; ty eth yn-bann dhe'm growedhva.

⁵‘Breder yw Simeon ha Levi.

Arvow garowder yw aga hellylli.

⁶Na wres ow enev entra yn aga hevrin;

na vedhes ow enor kesunys gans aga huntelles;

rag yn aga sorr i a ladhas gour,

war-lergh aga sians i a iowennas tarow.

⁷Milliges re bo aga sorr, rag fell yw,

ha'ga honnar, rag tynn yw.

My a wra aga ranna yn Yakob

ha'ga skattra yn Ysrael.

⁸‘Yuda, dha vreder a wra dha wormel.

Yma dha leuv war gilbenn dha eskerens.

Mebyon dha das a ombleg dhiso.

⁹Kolen lew yw Yuda.

Dhiworth an preydh, ow mab, ty res eth yn-bann.

Ev a blattyas, ev a wrowedhas kepar ha lew,

ha kepar ha lewes; piw a wra dhodho sevel?

¹⁰Ny dreyl an welenn dhiworth Yuda

na'n dernwelenn a-dhiworth y dreys,

erna dheffo ev neb a's pew;

ha dhodho ev y fydh omaj an poblow.

¹¹Ow kelmi y asenik dhe'n gwinbrenn

hag ebel y gasek-asen dhe'n gwinbrenn flour,

ev a wolgh y dhillas y'n gwin,

ha'y bows yn goes grappys.

¹²Terlentri a wra y dhewlagas gans gwin,

ha gwynn vydh y dhyns gans leth.

¹³‘Zebulun a vydh trigys orth an morrep,

hag a vydh porth rag gorholyon;

ha'y denewen a vydh troha Sidon.

¹⁴‘Asen askornek yw Yssakar

ow krowedha ynter an dhew sagh-diber.

¹⁵Ev a welas bos da y bowesva,

ha hweg an tir;

ev a blegyas y skoedh dhe'n begh,

hag a veu gorrys dhe hwel krev avel kethwas.

¹⁶‘Dan a varn y bobel

avel onan a loethow Ysrael.

¹⁷Dan a vydh sarf ryb an fordh,

nader ryb an troe'lergh,

ow tynsel gwewennow an margh

may koedh y varghek war-dhelergh.

¹⁹‘Gad, bagas a omsett er y bynn,

mes ev a omsett erbynn an re dhelergh.

²⁰‘Yn-mes a Asher rych vydh y vara,

hag ev a re boes denti ryel.

²¹‘Naftali yw ewik delivrys dhe wari;

ev a re elenes teg.

²²‘Skorrenn leun a frut yw Yosep,

skorrenn leun a frut ryb fenten.

Yma y varrow ow resek dres an ke.

²³An sethoryon a'n provokyas yn feur.

Eskarogeth a's teva er y bynn;

²⁴mes y warak a dhuryas fyrv

ha giow y dhiwdhorn

dre dhiwdhorn an Galloesek a Yakob,

yn hanow an Bugel, karrek Ysrael,

²⁵dre Dhuw dha das neb a'th weres,

ha'n Ollgalloesek neb a'th vennik,

gans bennathow an nevow a-vann,

bennathow an downder a wrowedh war-nans,

bennathow diwvronn ha torr.

²⁶Bennathow dha das yw kreffa

es bennathow an menydhyow heb diwedh,

es bennathow an breow heb diwedh;

re bons war benn Yosep,

ha war dal an pryns yn mysk y vreder.

²⁷‘Benyamin yw bleydh ow skwardya;

Myttin ev a dheber y breydh,

ha gorthugher ev a rann an pyth re beu pyllys.’