Read the Bible

¹An Arloedh eth dhe weles Sara dell wrussa leverel, ha'n Arloedh a wrug dhe Sara kepar dell lavarsa. ²Rag Sara a gonsevyas ha dineythi mab rag Abraham yn y henys, y'n termyn may hwrussa Duw kewsel anodho. ³Hag Abraham a elwis hanow y vab re wrussa Sara dineythi dhodho, Ysak. ⁴Abraham a drodroghas y vab Ysak pan veu eth dydh y oes, dell wrussa Duw erghi dhodho. ⁵Hag Abraham o kans bloedh y oes pan veu y vab Ysak genys dhodho. ⁶Yn-medh Sara, ‘Duw re wrug dhymm hwerthin, ha peub a'm klew a hwerth genev vy.’ ⁷Hag yn-medh hi, ‘Piw a wrussa leverel dhe Abraham Sara dhe ri an vronn dhe vebyon? Rag my re dhineythis mab dhodho yn y henys.’

⁸An flogh a devis hag a veu didhenys; hag Abraham a wrug kevewi bras an keth jydh may feu Ysak didhenys. ⁹Ha Sara a welas mab Hagar an Ejyptyanes a wrussa dineythi dhe Abraham, ow kul ges. ¹⁰Ytho, yn-medh hi dhe Abraham, ‘Tewl yn-mes an gethes ma ha'y mab, rag ny vydh mab an gethes ma her gans ow mab, gans Ysak.’ ¹¹Pur dhrog o an dra yn golok Abraham drefenn y vab. ¹²Hag yn-medh Duw dhe Abraham, ‘Na vedhes drog y'th wolok drefenn an maw, na drefenn dha gethes. Goslow orth lev Sara yn pup-tra re leveris dhis rag der Ysak y fydh dha has henwys. ¹³Hag a has mab an gethes my a vynn gul kenedhel ynwedh rag yth yw dha has jy.’ ¹⁴Ytho Abraham a sevis yn-bann ternos vyttin a-varr ha kemmeres bara ha kroghen dowr ha'ga ri dhe Hagar orth aga gorra war hy diwskoedh, ha'n flogh, ha'y dannvon dhe-ves. Hi eth yn-kerdh ha gwandra yn difeythtir Beer-sheba.

¹⁵Ha gyllys an dowr y'n groghen, hi a dewlis an flogh yn-dann onan a'n bosow. ¹⁶Hi eth hag esedha a-dal dhodho, pell lowr, a-dro dhe denn gwarak, rag hi a leveris, ‘Na as vy dhe weles mernans an flogh.’ Ha hi a esedhas a-dal dhodho, ha drehevel hy lev hag oela. ¹⁷Duw a glewas lev an maw, hag el Duw a elwis dhe Hagar mes a nev ha leverel dhedhi, ‘Pandr'a hwer dhis, Hagar? Na gemmer own rag Duw re glewas lev an maw le may ma. ¹⁸Sav yn-bann, drehav an maw yn-bann, syns e er dha dhorn, rag my a vynn y wul kenedhel vras.’ ¹⁹Ena Duw a igoras hy dewlagas ha hi a welas puth dowr; hi eth, ha lenwel an groghen a dhowr ha'y ri dhe'n maw dhe eva. ²⁰Hag yth esa Duw gans an maw hag ev a devis ha triga y'n difeythtir ha dos ha bos sether. ²¹Yth esa trigys yn difeythtir Paran; ha'y vamm a gemmeras gwreg ragdho mes a bow Ejyp.

²²Y'n termyn na, Abimelek, ha Fikol pennhembrenkyas y lu, a leveris dhe Abraham, ‘Yma Duw genes yn pup-tra a wre'ta. ²³Lemmyn, to dhymmo omma re Dhuw na wre'ta ow thoella vy na hwath ow henedh nag ow linyeth, mes dyghtya vy ha'n tir may feus trigys ynno, war-lergh an tregeredh a wrug vy dhiso jy.’ ²⁴Hag yn-medh Abraham, ‘My a'n te.’

²⁵Abraham a reprevas Abimelek drefenn puth dowr re wrussa gwesyon Abimelek settya dalghenn ynno gans nerth. ²⁶Hag yn-medh Abimelek, ‘Ny wonn piw re wrug hemma. Ny wrussys ty dha honan y dherivas dhymm, na ny wrug vy klewes anodho kyns hedhyw.’ ²⁷Hag Abraham a gemmeras deves hag oghen ha'ga ri dhe Abimelek, ha'ga dew a wrug kevambos. ²⁸Abraham a worras a-denewen seyth oenes a'n flokk. ²⁹Hag Abimelek a leveris dhe Abraham, ‘Pyth yw an seyth oenes ma re wruss'ta aga gorra aga honan?’ ³⁰Yn-medh ev, ‘Ty a dhegemmer an seyth oenes ma a'm leuv vy dhe vos dustuni ragov, my dhe balas an puth ma.’ ³¹Rag hemma ev a elwis an tyller ma Beer-sheba drefenn i dhe di ena, aga dew. ³²Ytho i a wrug kevambos yn Beer-sheba. Ena Abimelek a sevis yn-bann, ha Fikol pennhembrenkyas y lu, hag i a dhehwelis dhe bow an Filistysi. ³³Abraham a blansas tamaryskenn yn Beer-sheba ha gelwel ena war hanow an Arloedh, Duw heb diwedh. ³⁴Hag yth esa Abraham trigys avel alyon yn pow an Filistysi lies dydh.