Read the Bible

¹Pan dheuth an seythves mis, ha mebyon Ysrael y'n sitys, an bobel a omguntellas gans unn akord yn Yerusalem. ²Ena Yeshua mab Yosadak a sevis, ha'y vreder an oferysi, ha Zerubbabel mab Shealtiel ha'y vreder, hag i a dhrehevis alter Duw Ysrael rag offrynna offrynnow leskys warnedhi, dell yw skrifys yn lagha Moyses gour Duw. ³I a settyas an alter war hy selyow, rag yth esa own dhedha a boblow an broyow na; hag i a offrynnas offrynnow leskys warnedhi dhe'n Arloedh, offrynnow leskys an myttin ha'n gorthugher. ⁴Hag i a withas goel an skovvaow, dell yw skrifys, hag i a offrynnas an offrynnow leskys pub-dydhyek, orth niver, herwydh an usadow ordenys rag pub dydh. ⁵Hag a-wosa, i a offrynnas an offrynnow leskys pub-dydhyek erell, a'n loeryow nowydh, hag a oll goelyow apoyntys an Arloedh, hag offrynnow a bubonan neb a wrug offrynn bolonjedhek dhe'n Arloedh. ⁶A-dhia gynsa dydh an seythves mis i a dhallathas offrynna offrynnow leskys dhe'n Arloedh. Mes ny veu sel tempel an Arloedh fondys hwath. ⁷I a ros arghans ynwedh dhe'n seri men, ha dhe'n seri prenn; ha boes, diwes hag oyl dhe'n dus a Sidon, ha'n dus a Tyr, may trollens sedres a-dhiworth Lebanon dhe vor Yoppa, herwydh an kummyas a dhegemmersens dhiworth Kyrus myghtern Persia.

⁸Y'n nessa blydhen wosa i dhe dhos dhe ji Duw yn Yerusalem, y'n nessa mis, Zerubbabel mab Shealtiel ha Yeshua mab Yosadak a dhallathas an ober, war-barth gans remenant aga breder, an oferysi ha'n Levysi, hag oll an re a dheuth mes a'n gethneth dhe Yerusalem. I a apoyntyas an Levysi, ugens bloedh po moy, dhe worweles ober chi an Arloedh. ⁹Ytho Yeshua, gans y vebyon ha'y vreder, Kadmiel ha'y vebyon, Binnuy ha Hodavya, oll war-barth, a worwelas an oberoryon yn chi Duw, gans mebyon Henadad ha'n Levysi, aga mebyon ha'ga breder.

¹⁰Ha pan fondyas an weythoryon sel tempel an Arloedh, an oferysi yn aga dillas a dheuth yn-rag gans hirgern, ha'n Levysi mebyon Asaf gans symbalys, rag gormel an Arloedh, ow siwya kevarwoedhyans Davydh myghtern Ysrael. ¹¹I a ganas, ow korthybi an eyl dh'y gila, gans gormola ha grasyans dhe'n Arloedh, ‘Rag ev yw da, rag y dregeredh a dhur bys vykken war Ysrael.’ Hag oll an dus a armas gans garm vras, ow kormel an Arloedh, drefenn bos settys sel chi an Arloedh.

¹²Mes lies a'n oferysi ha'n Levysi ha pennow an tasow, henavogyon hag a welas an kynsa chi, a oelas gans lev ughel pan welsons sel an chi ma fondys a-rag aga dewlagas, mes lies anedha a armas yn ughel gans lowena, ¹³ma na allas an bobel dissernya yntra tros garm a lowena ha tros oelva an bobel: rag an bobel a armas gans arm ughel, ha'n son a veu klewys y'n pellder.