Ezekiel 32
Galargan war Faro hag Ejyp
1Y'n dewdhegves blydhen, y'n dewdhegves mis, yn kynsa dydh an mis, ger an Arloedh a dheuth dhymm, ow leverel: 2Mab den, kemmer kynvann yn-bann rag Faro myghtern Ejyp, ha lavar dhodho,
Ty yw avel lew yowynk yn mysk an kenedhlow,
ha ty yw avel euthvil y'n moryow,
ow lemmel a-dro y'th avonyow,
ow tervyska an dowrow gans dha dreys,
hag ow stronka aga avonyow.
3Yndellma y lever an Arloedh Duw:
My a les warnas ow roes
yn kuntelles a lies pobel,
hag i a'th tre yn-bann y'm roes-draylya.
4My a'th tewl war an dor,
ha'th teghesi war an gwel,
ha gul dhe oll ydhyn an nevow triga warnas,
ha my a lenow oll bestes an norvys ahanas.
5My a worr dha gig war an menydhyow,
ha lenwel an nansow a'th karyn.
6My a worlyp an dor gans dha woes
ow resek bys y'n menydhyow,
ha'n goverow a vydh leun ahanas.
7Pan y'th tifeudhav, my a gudh an nevow
ha tewlhe aga ster;
my a gudh an howl gans kommolenn,
ha ny re an loer hy golow.
8My a dewlha warnas
oll golowys splann an nevow,
ha dri tewolgow war dha dir,
yn-medh an Arloedh Duw.
9My a drobel kolonn lies pobel
pan y'th tegav yn kethneth yn mysk an kenedhlow,
bys yn tiryow na aswonnydh.
10My a wra dhe lies pobel bos sowdhenys orthis,
ha'ga myghternedh a vydh dyegrys orthis,
pan swaysyav ow kledha a-ragdha;
ha pub den a gren
rag y vewnans pup-prys
y'n jydh dha derroes.
11Rag yndellma y lever an Arloedh Duw:
Kledha myghtern Babylon a dheu warnas.
12Dre gledhedhyow gwer alloesek
my a wra dhe'th routh koedha,
an fella yn mysk an kenedhlow.
I a dhomhwel goeth Ejyp,
hag oll hy routh a vydh diswrys.
13My a dhistru oll hy chatel
dhiworth amal dowrow meur;
ha ny wra troes den aga throbla arta,
na ny wra karnow chatel aga throbla.
14Ena my a wra dh'aga dowrow bos kosel ha kler,
ha my a wra dh'aga avonyow resek avel oyl, yn-medh an Arloedh Duw.
15Pan wrav dhe bow Ejyp bos ynyal,
ha pan vydh an tir destryppys a'y lanwes,
pan waskav oll an re usi trigys ynni,
ena i a woer my dhe vos an Arloedh.
16Homm yw an alargan a ganons. Myrghes an kenedhlow a's kan; i a's kan war Ejyp ha war oll hy routh, yn-medh an Arloedh Duw.
Ejyp a Dhiyskynn dhe'n Pytt
17Y'n dewdhegves blydhen, yn pymthegves dydh an mis, ger an Arloedh a dheuth dhymm, ow leverel,
18Mab den, kyn war routh Ejyp,
ha towl hi yn-nans,
hi ha'n myrghes a genedhlow galloesek,
bys yn rannow isella an norvys,
gans an re a dhiyskynn dhe'n pytt.
19Tekka ages piw osta?
Diyskynn! Growedh gans an re antrodreghys!
20I a goedh yn mysk an re ledhys gans an kledha. An kledha re beu tennys; i a's drayl dhe-ves gans oll hy routhow. 21Ledyoryon alloesek a gews yn-mes a Sheol a-dro dhedhi ha'y heffrysysi, ‘I re dhiyskynnas, i a wrowedh gans an re antrodreghys, gans an re ledhys gans an kledha.’
22Yma Assyria ena, hag oll hy ost, ha'ga bedhow oll a-dro dhedhi, i oll ledhys, koedhys der an kledha; 23Aga bedhow yw settys yn pella rannow an pytt, ha'y ost oll a-dro dh'y bedh, i oll ledhys, koedhys der an kledha, an re a wrug euth yn tir an re vew.
24Yma Elam ena hag oll hy routh a-dro dh'y bedh; i oll ledhys, koedhys der an kledha, gyllys yn-nans antrodreghys dhe isella rannow an norvys; i a wrug euth yn tir an re vew. I a berth aga meth gans an re a dhiyskynn dhe'n pytt. 25I re wrug gweli rygdhi yn mysk an re ledhys, gans oll hy routh, ha'ga bedhow a-dro dhedhi, i oll antrodreghys, ledhys gans an kledha; rag i a wrug aga euth yn tir an re vew, hag i a berth aga meth gans an re a dhiyskynn dhe'n pytt.
26Yma Meshek ha Tubal ena, hag oll hy routh, ha'ga bedhow a-dro dhedhi, i oll antrodreghys, ledhys gans an kledha, rag i a wrug euth yn tir an re vew. 27A ny wrowedhons gans an gasoryon erell antrodreghys a goedhas, a dhiyskynnas dhe Sheol gans aga arvow a vresel, may feu aga kledha gorrys yn-dann aga fenn? Y fydh kessydhyans aga hammweythresow war aga eskern; rag y feu euth an gasoryon ma yn tir an re vew. 28Ytho ty ynwedh a vydh terrys yn mysk an re antrodreghys, ha growedha gans an re ledhys gans an kledha.
29Yma Edom ena, hy myghternedh, hag oll hy fennsevigyon, a veu gorrys spit dh'aga galloes gans an re ledhys gans an kledha; i a wrowedh gans an re antrodreghys, gans an re re dhiyskynnas dhe'n pytt.
30Yma ena pennsevigyon an gledhbarth, i oll, hag oll an Sidonianys, a dhiyskynnas gans an re ledhys, shamys rag an euth a wrussons der aga nerth; i a wrowedh antrodreghys gans an re ledhys gans an kledha, hag i a berth aga sham gans an re a dhiyskynn dhe'n pytt.
31Pan wra Faro aga gweles, ev a vydh konfortys rag oll y routh a veu ledhys gans an kledha, Faro hag oll y lu, yn-medh an Arloedh Duw. 32Rag ev a wrug y euth yn tir an re vew; ytho ev a wrowedh yn mysk an re antrodreghys, gans an re ledhys gans an kledha, Faro hag oll y routh, yn-medh an Arloedh Duw.