Ezekiel 27
Kynvann War Tyr
1Ger an Arloedh a dheuth dhymm, ow leverel: 2Ty, A vab den, drehav kynvann erbynn Tyr. 3Lavar dhe Tyr yw esedhys orth entrans an mor, marchont an poblow war lies arvor, Yndellma y lever an Arloedh Duw:
Tyr, ty re leveris,
‘Perfydh ov vy yn tekter.’
4Yma dha oryon yn kolonn an moryow;
dha vyldyoryon a wrug perfydh dha dekter.
5I a wrug oll dha blenkys
a veryw dhiworth Senir;
i a gemmeras sedres dhiworth Lebanon
dhe wul gwern ragos.
6I a wrug dha roevow
a dherow dhiworth Bashan;
i a wrug dha flouryow a brenn kypres
dhiworth arvoryow Kittim.
7Sendal brosys dhiworth Ejyp
o dha woel, avel baner ragos;
ha'th kudhansow o glas ha purpur
dhiworth arvoryow Elisha.
8Trigoryon Sidon hag Arvad
o dha roevadoryon;
dha re skentel, A Tyr, esa ynnos,
i o dha varners.
9Yth esa henavogyon Gebal ha'y dus skentel ynnos,
ow kalkya dha folsyow.
Yth esa ynnos oll gorholyon an mor ha'ga marners,
dhe vargenya rag dha wara.
10Yth esa Persia, Lud ha Put y'th lu,
dha wer a vresel;
i a grogas skoes ha basnett ynnos,
i a ros dhis dha splannder.
11Yth esa mebyon Arvad ha Helek
war dha fosow a-derdro;
hag yth esa gwer Gammad y'th touryow.
I a grogas aga skoesow war dha fosow a-derdro;
i a wrug perfydh dha dekter.
Notes for verses 3–111 entry
Text notes
Ezekiel 27:11 Helek: Po Kilikia. View in passage
12Tarshish o dha gowethyas yn kenwerth, drefenn oll dha rychys a bub eghenn; i a geschanjyas arghans, horn, sten, ha plomm rag dha wara. 13Yavan, Tubal, ha Meshek, yth ens i dha varchons; enevow tus ha lestri a vrons a geschanjsons rag dha wara. 14Dhiworth chi Togarma i a geschanjyas mergh, mergh charettow, ha mulyon rag dha wara. 15Mebyon Dedan o dha varchons; yth esa lies arvor ow kenwertha genes; i a dhri dhis dans-olifans hag eboni avel trubyt. 16Aram o dha gowethyas yn kenwerth, dre reson dha lies askorr; greunet, purpur, brosweyth, lien fin, koral, ha rubi y rons rag dha wara. 17Yuda ha pow Ysrael o dha marchons; gwaneth a Minnith, tesenn, mel, oyl, ha balsam y rons yn keschanj rag dha wara. 18Damaskus o dha gowethyas yn kenwerth, dre reson dha lies askorr, hag oll dha rychys yn gwin a Helbon ha gwlan dhiworth Sahar. 19Gwin dhiworth Uzal a rens yn keschanj rag dha askorr, horn oberys, kassia, ha kalamus rag dha wara. 20Dedan o dha varchont yn pallennow-diber rag marghogeth. 21Arabia hag oll pennsevigyon Kedar o dha gowethysi yn kenwerth, gans eyn, hordhes, ha gever; y'n re ma i a genwertha genes. 22Marchons a Sheba ha Raama o dha varchons; an gwella spisyow hag oll meyn drudh hag owr a rens yn keschanj rag dha wara. 23Haran, Kanne, hag Eden, marchons a Sheba, Asshur ha Kilmad o dha varchons. 24I o dha varchons yn dillas teg, yn pann glas, ha brosweyth, ha strelyow liwek kelmys gans kerdyn tynn; yth esa an re ma yn mysk dha varchondis. 25Yth esa gorholyon Tarshish ow karya dha wara.
Notes for verses 12–252 entries
Text notes
Ezekiel 27:15 Dedan: Po war-lergh an Septuagint Rhodos. View in passage
Ezekiel 27:19 kalamus: Korsenn hweg, Acorus calamus, ynperthys dhe'n Tir Sans dhiworth Eynda yn furv polter. Pur dalvosek o, ha devnydhys yn oyl sans an untyans, Eks 30:23 hag y'n melysethow an moyha drudh. View in passage
Ty o leun ha kargys pur boes
yn kolonn an moryow.
26Yn dowrow ughel
roevadoryon a'th tros,
mes gwyns an est a'th terr
yn kolonn an moryow.
27Dha rychys, dha wara, dha varchondis,
dha varners, dha gaptenyon, dha galkyoryon,
dha werthoryon, hag oll dha soudoryon usi genes,
hag oll an mayni usi a-bervedh
a sedh yn kolonn an moryow
yn jydh dha goedh.
28Orth son leva dha varners
an peurvaow a gren.
29Oll an re a syns an roevow
a dheu yn-nans dhiworth aga gorholyon;
marners hag oll kaptenyon an mor
a sev war dir.
30I a dhrehav aga lev er dha bynn,
hag i a gri yn hwerow;
i a dewl doust war aga fennow
ha rolya yn lusu.
31I a omvoelha ragos
hag omwrogysa gans yskar.
I a oel warnas yn hwerowder enev,
gans kynvann hwerow.
32I a dhrehav kynvann ragos
ha kyni warnas,
‘Piw a veu distruys bythkweth kepar ha Tyr
yn kres an mor?
33Pan eth dha wara yn-mes war an moryow,
ty a walghas lies pobel;
dre dha rychys bras ha'th wara
ty a wrug golusek myghternedh an norvys.
34Lemmyn ty yw terrys gans an mor
yn downderyow an dowrow;
dha wara hag oll dha gowethysi
re sedhis genes.
35Oll trigoryon an arvoryow
a gemmer skruth orthis,
ha'ga myghternedh yw pur dhyegrys,
ha'ga fasow yw troblys.
36Gwikoryon an poblow a hwiban orthis;
ty re dheuth dhe euth tromm
ha ny vydhydh nevra namoy.’