Ezekiel 21
Kledha Lymm Duw
1Ger an Arloedh a dheuth dhymm, ow leverel: 2Mab den, sett dha fas troha Yerusalem; pregoth erbynn an sentris, ha profoes erbynn pow Ysrael, 3ha lavar dhe diredh Ysrael, Yndellma y lever an Arloedh: Awottavy er dha bynn; my a denn ow kledha dhiworth y woen ha treghi dhiworthis an den gwiryon ha'n tebelwas. 4Drefenn my dhe dreghi dhiworthis an den gwiryon ha'n tebelwas, gogledh. 5Ena oll kig a woer may hwrugavy, An Arloedh, tenna ow kledha dhiworth y woen; ny dhehwel arta. 6Ytho, A vab den, kyn gans diwglun ow krena, ha hanas yn hwerow a-rag aga dewlagas. 7Ha pan leverons dhis, ‘Prag yth esos ow hanasa?’ ty a lever, ‘Rag an nowodhow yw devedhys. Pub kolonn a deudh, ha pub leuv a vydh ydhil; pub spyrys a glamder, ha pub glin a dreyl dhe dhowr. Otta, hemma a dheu hag a hwyrvydh’, yn-medh an Arloedh Duw.
Notes for verses 1–71 entry
Text notes
Ezekiel 21:1 Gwersow 21:1 bys 32 yw niverys 21:6 bys 37 y'n tekst ebrow hag yn Septuagint. View in passage
8Ger an Arloedh a dheuth dhymm, ow leverel: 9Mab den, profoes ha lavar, Yndellma y lever an Arloedh: Lavar:
Kledha! Kledha yw lymmys,
hag ynwedh rutys splann,
10Lymmys yw rag an ladhva,
ha rutys splann rag may fo avel lughes.
A lowenhyn yn ternwelenn ow mab?
An kledha a dhispres pup-tra gwrys a brenn.
11Ev a'n ros dhe vos rutys splann,
rag bos dalghennys y'n leuv;
lymmys yw, an kledha yw rutys splann
dhe vos gorrys yn leuv an ladher.
12Garm hag oul, A vab den,
rag yth yw erbynn ow fobel,
yth yw erbynn oll pennsevigyon Ysrael.
Tewlys yns dhe'n kledha
war-barth gans ow fobel.
Rakhenna hwett dha vordhos!
13Rag y fydh prevyans. Ha fatla mar kwra an kledha despitya an dernwelenn? yn-medh an Arloedh Duw.
Notes for verse 131 entry
Text notes
Ezekiel 21:13 Ha fatla mar kwra an kledha despitya an dernwelenn: Styr an Ebrow yw ankler. View in passage
14Ytho ty, A vab den, profoes;
tak palv orth palv.
Gas an kledha dhe weskel diwweyth, teyrgweyth;
kledha rag an re ledhys yw,
kledha bras an ladhva,
usi oll a-dro dhedha.
15Rag may teuttho kolonnow
ha'n re a goedh bos lies.
Orth oll aga yetys my re worras
kledha rag ladhva.
Ogh, gwrys yw rag lughesi,
rutys splann rag an ladhva.
16Bydh lymm, treyl dhe'n dyghow,
gway dhe'n kledh,
plepynag a vo ervirys rag dha vin.
17My ynwedh a dak ow diwleuv war-barth,
ha gul dhe'm sorr powes.
My an Arloedh re gewsis.
Notes for verses 14–171 entry
Text notes
Ezekiel 21:14 usi oll a-dro dhedha: Po a wan ynna yn town. View in passage
18Ger an Arloedh a dheuth dhymm, ow leverel: 19Ty, A vab den, gwra ragos dha honan diw fordh rag kledha myghtern Babylon dhe dhos warnedha, aga diw ow tos yn-mes a'n keth pow; gwra post-arwoedh ha'y settya orth penn an fordh dhe'n sita. 20Gwra fordh rag kledha dhe dhos erbynn Rabba an Ammonysi, hag erbynn Yuda, hag erbynn Yerusalem yn hy kres. 21Rag myghtern Babylon a sev orth dallethvos an fordh, orth penn an dhiw fordh, dhe wul dewinieth. Ev a shak sethow, ev a hwila kusul orth an terafim, ev a vir orth an avi. 22Yn y leuv dhyghow y teu koelbrenn Yerusalem, dhe igeri an ganow rag an ladhva, dhe dhrehevel an lev y'n kri a vatel, dhe settya hor'bennow erbynn an yetys, dhe grugya gweythyow-gorheas. 23Mes y fydh haval dhe dhewinieth fals yn aga dewlagas i, an re a dos tiow; mes ev a's kovha a'ga anewnder, may fons kechys.
Notes for verses 18–231 entry
Text notes
Ezekiel 21:20 yn hy kres: Amendys war-lergh an Septuagint. Ebrow kerys. View in passage
24Rakhenna yndellma y lever an Arloedh Duw: Rag hwi dhe dhri agas kammweyth dh'agas kovadh, dre dhiskudhans agas kammweythresow, may fo gweladow agas peghosow yn oll agas drogoberow – rag hwi dhe dhri hemma dhe govadh, hwi a vydh kemmerys yn leuv an eskar.
Notes for verse 241 entry
Text notes
Ezekiel 21:24 yn leuv an eskar: Ebrow gans an leuv. Po amendyans war-lergh an Septuagint ynna. View in passage
25Ha ty pennsevik Ysrael, tebelwas ansans,
may teuth y dhydh,
termyn y gessydhyans finek,
26yndellma y lever an Arloedh Duw:
Diwisk an tulyfant ha kemmer dhe-ves an gurun;
ny vydh par dell veu.
Ughelha an isel,
hag uvelha an ughel.
27Magoryow, magoryow,
magoryow y'n gwrav,
ma na veu y hevelep,
bys pan dheu ev may ma dhodho an gwir;
ha my a'n re dhodho.
28Ha ti, A vab den, profoes ha lavar, Yndellma y lever an Arloedh Duw a-dro dhe vebyon Ammon hag a-dro dh'aga heredh; lavar:
Kledha, kledha,
tennys rag ladhva,
rutys splann dhe gonsumya, dhe lughesi!
29Dha welesigethow yw fals
ha 'th tewinieth yw gowek
dh'y settya war gonnaow
an debeles ansans;
aga dydh re dheuth,
termyn an kessydhyans diwettha.
30Gorr e dh'y woen!
Y'n tyller may feus formys,
yn tir dha dhalleth
y'th vreusav.
31My a dhinwa ow sorrvann warnas;
gans tan ow honnar
y hwithav warnas.
My a'gas re yn leuv gwer vilus,
skentel yn distruyans.
32Y fydhydh keunys rag an tan,
dha woes a vydh yn kres an tir;
ny vydhydh kovhes na fella,
rag my an Arloedh re gewsis.