Read the Bible

¹An Arloedh a leveris dhe Moyses, ‘Dibarth, ke alemma, ty ha'n bobel a wrussys dri yn-mes a bow Ejyp, dhe'n tir a ambosis dhe Abraham, Ysak ha Yakob, ow leverel, “Dhe'th tiyskynnysi my a'n re.” ²My a wra dannvon el a-ragos ha my a wra gorra dhe-ves an Kananysi, an Amorysi, an Hittysi, an Perizzysi, an Hivysi ha'n Yebusysi. ³Ke dhe dir a dhinwa leth ha mel; mes ny wrav mos y'n kres ahanas, ma na'th kowllytthiv, rag pobel kales hy hilbenn yth os.’

⁴Pan glewas an bobel an yeyn nowodhow ma, i a gynis; ha ny wiskas denvyth y degennow. ⁵Rag an Arloedh re lavarsa dhe Moyses, ‘Lavar dhe vebyon Ysrael, “Ty yw pobel kales dha gilbenn; mar teffen unn pols y'n kres ahanas, my a'th kowlladhsa. Ytho, diwisk dha degennow a-dhiworthis, may hwodhviv an pyth dhe wul genes.” ’ ⁶Ytho mebyon Ysrael a stryppyas dhe-ves aga thegennow, a venydh Horeb ha war-rag.

⁷Lemmyn Moyses a gemmeri an tylda ha'y settya a-ves dhe'n kamp, pell a-ves dhe'n kamp; hag ev a'n henwis tylda an kuntelles. Ha pub huni a hwila an Arloedh a wre mones dhe dylda an kuntelles, esa a-ves dhe'n kamp. ⁸Pan e Moyses yn-mes dhe'n tylda, oll an bobel a sevi, ha pub den a sevi orth daras y dylda, ha mires war-lergh Moyses, bys pan alsa a-ji dhe'n tylda. ⁹Pan entra Moyses y'n tylda, an goloven a gommol a dhiyskynna ha sevel orth daras an tylda, ha'n Arloedh a gewsi gans Moyses. ¹⁰Pan weli an bobel an goloven a gommol ow sevel orth daras an tylda, oll an bobel a sevi ha gordhya, pub den orth treudhow y dylda. ¹¹Yndella y kewsi an Arloedh dhe Moyses, bejeth dhe vejeth, dell gews den orth y goweth. Ena y treylya Moyses arta dhe'n kamp, mes y venyster Yoshua mab Nun, gour yowynk, ny dhibartha a'n tylda.

¹²Moyses a leveris dhe'n Arloedh, ‘Mir, ty a lever dhymm, “Doro an bobel ma yn-bann;” mes ny'm gessys dhe wodhvos piw a dhannvonydh genev. Hwath re leversys, “My a'th aswonn dre hanow, ha ty re gavas gras y'm golok.” ¹³Lemmyn ytho, my a'th pys, mar kevis gras y'th wolok, diskwedh dhymm lemmyn dha fordhow, ma'th aswonniv ha kavoes gras y'th wolok. Preder ynwedh bos an genedhel ma dha bobel.’ ¹⁴Ev a leveris, ‘My ow honan a wra mos genes, ha my a re dhis powes.’ ¹⁵Hag ev a leveris dhodho, ‘Mar nyns edh genev, na wra agan dri alemma. ¹⁶Rag fatell vydh godhvedhys my dhe gavoes gras y'th wolok, my ha'th pobel? A nyns yw ty ow kerdhes genen, may fen diblans, my ha'th pobel, dhiworth oll an poblow usi war enep an nor?’ ¹⁷Ha'n Arloedh a leveris dhe Moyses, ‘An keth tra ma re gewssys, my a'n gwra; rag ty re gavas gras y'm golok, ha my a'th aswonn dre hanow.’ ¹⁸Moyses a leveris, ‘My a'th pys, diskwedh dhymm dha wolewder.’ ¹⁹Hag ev a leveris, ‘My a wra oll ow dader dhe dremena a-ragos, ha my a elow ow hanow, an Arloedh, a-ragos; ha grassyes vydhav dhe neb a vydhav grassyes dhodho, ha bos truedhek dhodho dhe neb yth ov truedhek.’ ²⁰Mes y leveris, ‘Ny welydh ow fas; rag ny'm gwel den ha bewa.’ ²¹An Arloedh a leveris, ‘Ottomma tyller y'm ogas le may sevydh war an garrek; ²²ha'm golewder ow tremena, my a wra dha worra yn fols y'n garrek, ha'th kudha gans ow dorn ha my ow tremena; ²³ena my a wra gorra ow dorn a-denewen, ha ty a welvydh ow heyn; mes ny vydh gwelys ow fas.’