Ekklesiastes 1
Prolog: Pup-tra yw Euver
1Geryow an Pregowther, mab Davydh, myghtern yn Yerusalem.
Notes for verse 11 entry
Text notes
Ecclesiastes 1:1 an Pregowther: Po Hembrenkyas an Kuntelles. View in passage
2Euveredh a euveredh, yn-medh an Pregowther,
euveredh a euveredh, pup-tra yw euver.
3Pandr'yw an gwayn dhe vebyon den der oll aga ober kales
a wrons i dhe oberi omma yn-dann an howl?
4Henedh a dremen ha henedh a dheu,
mes an norvys a dhur bynitha.
5An howl a dhrehav ha'n howl a sedh,
ev a fisten dh'y le may trehav anodho arta.
6Dhe'n dhyghowbarth y hwyth an gwyns,
hag a dreyl dhe'n gledhbarth;
a-dro hag a-dro y treyl,
ha dehweles, ow mos a-dro arta yn y hynsyow.
7An goverow oll a res dhe'n mor,
byttegyns nyns yw an mor leun nevra:
dhe'n tyller may hwre an goverow resek anedha kyns,
y hwrons i resek arta
8Oll an taklow ma yw skwithus:
ny yll denvyth kewsel a-dro dhedha.
Nyns yw an lagas gwalghys gans gweles,
na'n skovarn gorlenwys gans klewes.
9An pyth re hwarva, an keth henna a hwyrvydh arta;
ha'n pyth re beu gwrys, an keth henna a vydh gwrys arta,
ha nyns eus travyth nowydh yn-dann an howl.
10Eus neppyth may hyllir leverel a-dro dhodho,
‘Otta, nowydh yw hemma’?
Nag eus, seuladhydh ev re beu,
pell kyns agan oes ni.
11Nyns eus kov a'n taklow usi passyes;
na ny vydh a'n taklow hwath dhe dhos,
ny vydhons i kovhes gans an
re a dheu a-wosa.
Raglavar
12My, an Pregowther, my re beu myghtern war Ysrael, yn Yerusalem, 13ha my a settyas ow brys yn furneth dhe hwilas ha hwithra pup-tra re beu gwrys yn-dann nev. Beghus yw an ober re ros Duw dhe vebyon den, gans meur a daklow dhe wul. 14My re welas pup-tra yw gwrys yn-dann an howl: hag otta, yth yw oll hemma euveredh ha chasya war-lergh an gwyns.
15An pyth yw kamm ny yllir y wul kompes:
an pyth a fyll ny yllir y rekna.
16My a leveris y'm kolonn, ‘My re dheuth ha bos meur, ha furra ages oll an re esa dres Yerusalem kyns ow thermyn vy: ow holonn re brederis a furneth ha skians.’ 17Ytho my a settyas ow brys dhe wodhvos furneth ha dhe gonvedhes muskokter ha follneth; ha my a wodhva hemma ynwedh dhe vos yeuni war-lergh an gwyns.
18Rag yn palster a furneth yma meur a dhuwon,
ha seul a guntell godhvos a guntell poen.