Read the Bible

¹Hiram myghtern Tyr a dhannvonas kannasow dhe Davydh, ha prenn sedres, gans seri men ha seri prenn ha karpentoryon dhe dhrehevel chi ragdho. ²Davydh a gonvedhas an Arloedh dh'y fastya avel myghtern war Ysrael, ha dhe ughelhe y vyghterneth a-barth y bobel Ysrael.

³Davydh a gemmeras moy gwragedh yn Yerusalem, ha Davydh a dhineythis moy mebyon ha moy myrghes. ⁴An re ma yw henwyn an fleghes a veu dineythys dhodho yn Yerusalem: Shammua, Shobab, Nathan, Solomon, ⁵Ybhar, Elishua, Elifelet, ⁶Noga, Nefeg, Yafia, ⁷Elishama, Beelyada, hag Elifelet.

⁸Pan glewas an Filistysi Davydh dhe vos untys myghtern war oll Ysrael, oll an Filistysi eth yn-bann dhe hwilas Davydh; mes Davydh a glewas anodho ha mos yn-nans er aga fynn. ⁹Pan dheuth an Filistysi ha gul omsettyans yn nans Refaim, ¹⁰Davydh a wovynnas orth Duw, ‘A wrav vy mones yn-bann erbynn an Filistysi? A wredh aga re y'm leuv?’ An Arloedh a leveris dhodho, ‘Ke yn-bann, ha my a's re y'th leuv.’ ¹¹Ytho i a dheuth yn-bann dhe Baal-perasim, ha Davydh a's fethas ena. Yn-medh ev, ‘An Arloedh re dardhas der ow eskerens der ow leuv, kepar dell dardh dowrow.’ Rakhenna i a elwis an tyller na Baal-perasim. ¹²I a asas aga duwow ena, ha Davydh a ros arghadow hag i a veu leskys yn tan.

¹³Unnweyth arta an Filistysi a wrug omsettyans y'n nans. ¹⁴Pan wovynnas Davydh orth Duw arta, Duw a leveris dhodho, ‘Ny edh yn-bann war aga lergh; ke a-dro a-dryv dhedha ha deus warnedha a-dal an gwydh balsam. ¹⁵Pan glewydh son avel keskerdh yn penn an gwydh balsam, ena ke yn-mes dhe'n vatel; rag Duw res eth yn-mes a-dheragos dhe weskel lu an Filistysi.’ ¹⁶Davydh a wrug dell erghis Duw dhodho, hag i a weskis lu an Filistysi dhiworth Gibeon bys yn Gezer. ¹⁷Ger-da Davydh a lesas der oll an powyow ha'n Arloedh a dhros own anodho war oll an kenedhlow.