Mae Myfyrdodau Dyddiol Cymdeithas y Beibl yn dilyn cynllun darllen Beibl M'Cheyne, a ddyluniwyd ar gyfer y rhai sydd am ddarllen y Beibl cyfan mewn blwyddyn. Mae pob myfyrdod yn canolbwyntio ar un o'i bedair pennod ddyddiol. Darllenwch rhain yn Gymraeg.
Arglwydd, trugarha. Glanha fi. Tawela fy meddwl. Helpa fi i wrando wrth i ti siarad.
Mae Ioan 16 nid yn unig yn datgelu dryswch y disgyblion wrth i Ddydd Gwener y Groglith agosáu, ond ymddengys ei fod yn adlewyrchu cythrwfl Eglwys ifanc sy'n wynebu erledigaeth ac nid yw Iesu bellach yn ei chanol. Mae’n debyg fod 'Pryd mae'n dod yn ôl i fynd â ni adref?' wedi bod yn gwestiwn rheolaidd ar wefusau pobl.
Mae’r adnodau yn sôn am boen, wylo a galaru. Ond yn union fel bore’r Pasg oedd y trobwynt o ing i lawenydd i’r disgyblion cyntaf, mae Ioan yn cysuro ei ddarllenwyr trwy eu hatgoffa bod Iesu, drwy’r Ysbryd Glân, yn dal yn eu plith.
Gwers a ddysgais yn gyflym fel Cristion ifanc oedd peidio â chamddarllen ymadrodd a oedd yn gyffredin ar y pryd - 'Mae Duw yn eich caru chi ac mae ganddo gynllun rhyfeddol ar gyfer eich bywyd' – fel bydd 'popeth yn wych o hyn ymlaen'. Fel y gŵyr pob carwr profiadol, nid yw cariad yn diystyru poen, ond mae'n ei gynnwys. Mae'r gred bod sofraniaeth a rhagluniaeth Duw yn bolisi yswiriant yn erbyn treialon a gorthrymderau yn cael ei gamgymryd.
Ond nid dyma ble mae Iesu'n gorffen. ‘Byddwch yn drist go iawn, ond bydd y tristwch yn troi'n llawenydd’ meddai (adnod 20). Y darlun y mae'n ei defnyddio yw merch sydd ar fin esgor: mae cysylltiad annatod rhwng cariad a dioddefaint ac mae'r canlyniad yn werth yr ymdrech.
Arglwydd, gan fod bywyd fel yr oeddem yn ei adnabod wedi newid a phryder yn rheoli'r dydd, helpa fi i ddal i ymddiried bod dy Ysbryd yno i'm tywys ac y bydd poen yn troi'n llawenydd.
Ysgrifennwyd y myfyrdod hwn gan Michael Pfundner, Rheolwr Cefnogi Cyhoeddi Cymdeithas y Beibl.
Read the Bible 
Processing...