Amser i adeiladu: 2 Samuel 19.1–30 (22 Medi 2020)

Gweddi

Arglwydd, agor fy nghlustiau i glywed yr hyn sydd gen ti i’w ddweud wrthyf; agor fy nghalon i garu dy air, ac agor fy meddwl i ddeall dy wirionedd.

Darllen

2 Samuel 19 2 Corinthiaid 12 Eseciel 26 Salm 74

Myfyrdod Dyddiol: 2 Samuel 19.1–30

Nid yw Dafydd yn ddiogel ar ei orsedd eto, ac mae perygl iddo ddieithrio ei gefnogwyr gan alar dros Absalom. Gorfodir Joab, ei gynghreiriad allweddol, i’w geryddu (adnodau 5-8). Roedd teyrngarwch y llwythau gogleddol, a fyddai’n gwrthryfela yn erbyn ŵyr Dafydd i greu’r deyrnas ar wahân Israel, yn dal i fod yn sigledig. Mae Dafydd yn ceisio eu heddychu trwy ddisodli Joab fel pennaeth y fyddin gydag Amasa, ei gefnder, a fu’n bennaeth ar wrthryfelwyr Absalom. Mae’n brawf trawiadol o ymddiriedaeth sydd hefyd yn cosbi Joab am ei anufudd-dod.

Yn y bennod hon mae Dafydd yn anelu at gymodi yn hytrach na dial. Mae’n dweud wrth Joab a’i frawd Abishai ‘ddylai neb yn Israel gael ei ladd heddiw’ (adnod 22); ni all ddatrys honiadau cystadleuol Siba a Meffibosheth, felly mae’n drugarog â’r ddau ohonynt (adnod 29).

Felly yma, gallwn weld Dafydd yn gweithredu fel iachawr yn hytrach nag fel buddugwr. Nid yw’n bwrw ymlaen â’i fantais trwy ddinistrio ei elynion; mae ef yn hytrach eisiau eu hennill i’w ochr o.

Yn ein hoes ni, gall cymdeithas a gwleidyddiaeth gael eu polareiddio’n fawr. Ychydig iawn o gytundeb cydsyniol sydd ar y cyfryngau cymdeithasol gan ein bod yn bodoli o fewn ein swigod barn a chred ein hunain, a gall ‘diwylliant canslo’ arwain at ymosodiad ar raddfa lawn ar y rhai nad ydynt yn ffitio’r naratif cyffredinol. Mewn eglwysi hefyd, gall y rhai nad yw eu barn yn cyd-fynd â barn y mwyafrif fod mewn perygl o gael eu gwahardd; mae ‘enillwyr’ a ‘chollwyr’.

Mae ymdriniaeth Dafydd o’r rhai sydd wedi eu gorchfygu yn cynnig model gwahanol. Mae ef am adeiladu, nid dinistrio.

Gweddi

Duw, helpa fi i weld y rhai rydw i’n anghytuno â nhw nid fel gelynion i gael eu dinistrio, ond fel ffrindiau sydd eto i’w hennill.